Kishin informacione nga burime të ndryshme se në veri të Mitrovicës në fshatin Suhodoll ka mbetje mortore nga lufta e fundit në Kosovë. Prandaj pa humbur kohe filluan me gërmime ekipet nga Instituti i Mjekësisë Ligjore.
Entuziazmi ishte madh sepse antropologet ishin të bindur se do të gjenin mbetje mortore të një personi.
Banorët nga kjo zonë tregojnë së edhe më herët në këto varreze kishin gjetur mbetje eshtërore.
Gërmimet vazhduan me orë të tëra. Por rezultatet nuk po dukeshin shpresëdhënëse. Megjithatë vullneti nuk mungonte që punës ti shkohej deri në fund.
Krejt në fund rezultatet e kërkimit dolën negative.
Antropologu Forenzik, Ditor Haliti, thotë se informata që ata i posedonin nuk dolën të ishin sakta.
Doktor, Naim Uka, po e sheh si shumë sfiduese mungesën e informacioneve të besueshme nga pala serbe në këtë proces.
Një problem tjetër i madh po del të jetë edhe distanca kohore që prej zhdukjes së personave.
“Ishim te bindur se këtu do të gjenim mbetje kockore, sepse kishim disa informata dhe disa foto që tregonin për këtë lokacion. Një problem shumë i madh është edhe koha gjatë që ka kaluar, janë bërë më shumë 23 vjet dhe kjo e vështirëson situatën në terren”, tha Javier Naranjo, antropolog forenzik.
E udhëheqësi i Njësisë së Komisionit Qeveritar për Persona të Zhdukur, Kushtrim Gara, thotë se Kosova po e merr me shumë seriozitet këtë çështje, por që e njëjta nuk mund të thuhet për autoritetet serbe.
Përkundër insistimit nga ekipet e mjekësisë ligjore për të vazhduar punën edhe në Serbi, procesi i gërmimeve nga pala serbe është duke u neglizhuar tash e sa kohë.
Raporti i gazetarit Shpat Blakçori.
