Me fraza motivuese fëmijët nisin ditën në njërën nga kopshtet e kryeqytetit.
Por, pagesa për qëndrimin e tyre ka shënuar rritje thuajse në secilin kopsht të Prishtinës.
Ngritja e çmimeve preku edhe institucionet parashkollore private në vend, e në këtë formë prindërve iu shtua edhe një barrë tjetër për buxhetin familjar.
Por, prindërit nuk fajësojnë kopshtet për këtë ngritje me faktin se janë ngritur çmimet edhe në produkte tjera.
“Ngritje ka pas edhe në kopshtin ku është fëmiu im por nuk mund ta fajësoj pas ngritjeve të çmimeve në sende tjera normal pas shpenzimeve që I kanë kopshtet kjo i ka prek edhe kopshtet”, thotë Liridon Shala, prind.
“E përballueshme nuk është po pasi janë ngrit të gjitha thuajse pastaj edhe të kopshtet, e papërballueshme sepse rrogat nuk po rritën hiq e çmimet po”, ka thënë një prind tjetër, Flamur Selmanaj.
Nënkryetarja e asociacionit të institucioneve parashkollore private, Sadete Bucolli thotë se çmimet ndryshuan varësisht prej lokacionit dhe nivelit të cilësisë.
Sipas saj, çmimet janë rritur nga 15 deri në 20%, dhe kjo nuk është mirëpritur aspak nga prindërit.
“Çmimet janë të ndryshme varësisht prej lokacionit, nivelit të cilësisë supozojmë që prej 100 kanë shku 120, 120-140 ose 140-160, pra diku rreth 15-20% ka pas ngritje te kopshtet. Është barrë shumë e madhe për prindërit dhe nuk është që e kanë prit mirë por e kanë kuptu…”, ka theksuar Bucolli
Pagesa mujore ka shënuar lëvizje në institucionet parashkollore me arsyetimin se janë rritur çmimet e produkteve bazë gjithandej.
Kronikë e realizuar nga gazetarja Lendrina Kodrolli