Qytetarët e Kosovës mund të përballen sërish me ngritjen e çmimit të energjisë elektrike.
Për shkak të mos-disbursimit të 90 milionë eurove të zotuara nga Qeveria, Furnizuesi i Shërbimit Universal (KESCO), ka thënë se po operon nën kosto. Për rrjedhojë ka dorëzuar Aplikimin për shqyrtim të jashtëzakonshëm të të hyrave të lejuara maksimale.
E shumë shpejt në Zyrën e Rregullatorit të Energjisë do të dërgohet edhe një kërkesë për shqyrtim të jashtëzakonshëm të tarifave të energjisë elektrike.
“Ne nuk kemi pranuar subvencionin nga Qeveria, dmth është fjala për 90 milionë euro, për këtë arsye ne kemi tejkalu 5 % e shpenzimeve. Për këtë arsye kemi kërkuar shqyrtim të jashtëzakonshëm në ZRRE. Faktikisht ne fillimisht kemi kërkuar për të hyra maksimale të lejuara e ditëve në vijim do të aplikojmë për shqyrtim të tarifave”, thotë zëdhënsja e KEDS-it, Margarita Rashiti.
Nga Zyra e Rregullatorit të Energjisë nuk i kanë treguar televizionit se deri në çfarë mase mund të ketë shtrenjtim të energjisë, por kanë konfirmuar që janë duke shqyrtuar aplikimin e KESCO-s.
Ndërsa gjatë ditës, ministrja e Ekonomisë, Artane Rizvanolli ka thënë se arsye e mos-disbursimit të subvencionit është pamundësia e gjetjes së një zgjidhjeje teknike-operacionale. Megjithatë, ajo ka premtuar se kjo punë do të kryhet shpejt.
“Deri tani kemi qenë duke punuar me disa pauza në gjetjen e zgjidhjeve teknike operacionale për ta realizuar subvencionin, javën e kaluar kemi marrë kërkesën nga ana e ZRrE-së konfirmimin se kalkulimet që janë bërë nga ana e furnizuesit të shërbimit universal janë të sakta dhe kemi marrë kërkesën për pagesë, jemi në konsultim edhe me sekretariatin e komitetit të energjisë dhe USAID-in, të cilët kanë ofruar mbështetje teknike për mënyrën e realizimit të marrëveshjes. Është diçka në të cilën jemi duke punuar intensivisht dhe besojmë që do të ndodh shumë shpejt”, ka thënë Rizvanolli.
Rizvanolli bëri thirrje që të kursehet energjia elektrike.
Pro idesë së kursimit është edhe njohësi i çështjeve të energjisë, Vezir Rexhepi. Mirëpo për të, çmimi i lartë i energjisë në tregjet ndërkombëtare e bën të pashmangshëm ngritjen e çmimit të saj për konsumatorët në Kosovë.
“Është e pamundur të operohet me këto çmime sidomos periudhës së dimrit kur na nevojitet importi. Pra të bëhet një import me një çmim psh mesatar 300 ose 400 dhe të mbulohet psh ky çmim nga KESCO psh të furnizohet konsumatori pa rritje të çmimit të energjisë, është vërtet i pamundur”, thotë Rexhepi.
Ndryshe e ftuar para Komisionit Hetimor Parlamentar për menaxhimin e energjisë, ministrja Rizvanolli para disa ditës ka thënë se për subvencionim të energjisë deri në këtë pikë të vitit janë shpenzuar afro 23 milionë euro.
Kronika e realizuar nga gazetari Gojart Jashari.
