Me zhurmë të madhe mediatike u përcollën dy aksionet e Policisë në pikat kufitare të Kosovës, të njohura si “Pika1” dhe “Pika2”.
Si rezultat i këtyre aksioneve u arrestuan 74 zyrtarë policorë, si të dyshuar për korrupsion.
Mirëpo, Sindikata e Policisë pretendon se një pjesë e madhe e tyre u arrestuan pa pasur prova.
Kryetari i Sindikatës, Imer Zeqiri, këtë e ka bazuar në një vendim të Prokurorit të Shtetit.
Zeqiri, madje ka kundërshtuar edhe formën që ishte përdorur për vënien e të dyshuarve para drejtësisë.
Pjesë e aksionit të arrestimeve ishte Inspektorati Policor. Pavarësisht asaj që thonë në Sindikatën e Policisë, ky institucion i vlerëson arrestimet e policëve si aksionet më të suksesshme në luftën kundër korrupsionit.
Sipas IPK-së, për të gjithë të dyshuarit ka pasur prova të mjaftueshme.
“Sigurisht që për këtë rast ka prova dhe të njëjtat janë dorëzuar në Prokurorinë Speciale, ashtu siç e parasheh Kodi i Procedurës Penale. Sidoqoftë provat nuk mund t’ua prezantojmë Sindikatës së Policisë. Shumica e veprimeve inkriminuese të zyrtarëve policorë të dyshuar në këtë rast janë të dëshmuara më zë dhe figurë. Është kompetencë e prokurorit të vlerësoj dhe vendos më tutje vazhdimin e procedurave penale për secilin prej të dyshuarve në këtë rast”, thonë nga Inspektorati Policor.
“Pika1” dhe “Pika2”, u kishte paraprirë një hetim 1 vjeçar me dyshimin për përfshirje në vepra të kundërligjshme, si “keqpërdorim i detyrës zyrtare” dhe “marrje ryshfeti”.
Kronika e realizuar nga gazetarja Florijeta Dernjani.