75 milionë euro u ndan në janar të këtij viti për subvencionimin e energjisë elektrike.
Megjithëse jemi në muajin e tetë të vitit, këto para nuk kanë shkuar në destinimin e tyre.
KESCO në Zyrën e Rregullatorit të Energjisë ka aplikuar për Shqyrtim të Jashtëzakonshëm të të Hyrave të Lejuara Maksimale.
“Në aplikacionin për shqyrtim të jashtëzakonshëm, FSHU thekson se është duke operuar nën kosto, pasi që kostot e FSHU-së nuk janë duke u mbuluar përmes tarifave dhe subvencionit të lartpërmendur, si rezultat i mos disbursimit të subvencionit nga Qeveria e Republikës së Kosovës. Sipas FSHU-së, vlera e subvencionit për periudhën 9 shkurt – 30 qershor 2022 ka tejkaluar shumën prej 32.8 milion euro”, thuhet në njoftimin e ZRRE-së.
Lidhur me këtë, ZRRE-ja pritet që brenda disa javësh të marrë një vendim lidhur me tarifimin e energjisë.
“Duke qenë se një situatë e tillë për shkak të mos disbursimit të subvencionimit mund të rrezikojë sigurinë e furnizimit me energji elektrike, ngase operatorët e sektorit të energjisë janë duke i ekspozuar ndaj rrezikut të lartë të likuiditetit financiar, Rregullatori kërkon nga Furnizuesi me Shërbim Univerzal, që konform dispozitave për të hyrat e FSHU-së, brenda afatit 20 ditor t’i dërgojë ZRRE-së raportin për ndikimin financiar nga gjendja e jashtëzakonshme”, thuhet më tej në njoftim.
Për këtë çështje KESCO i ishte drejtuar ZRRE-së, që nga muaji prill, e cila më pas e kishte adresuar çështjen tek Ministria e Ekonomisë dhe ajo e Financave, Punës dhe Transfereve.
Por në letrat e publikuara nga ZRRE, thuhet se përgjigjja nga këto institucione ka munguar.
Për shkak të krizës energjetike, tarifat e rrymës ishin kategorizuar në bazë të shpenzimeve mujore të shfrytëzuesëve, për të cilën partitë opozitare kishin kundërshtuar, madje u ishin drejtuar edhe Gjykatës.
Raporti i gazetares Florijeta Dernjani.
