Mbi 10 automjete të rënda kishin bllokuar rrugën që lidh Kosovën me Serbinë.
Serbët lokalë aty po qëndronin dhe po e vëzhgonin situatën.
Paralajmërimet e njëpasnjëshme që vinin nga pjesëtarët e KFOR-t nuk i bënin shumë përshtypje.
E pas bisedimeve me forcat e KFOR-t qytetarët serbë nuk kishin zgjidhje tjetër pos t’i largonin mjetet e rënda.
Megjithatë këtë proces e bënin shumë ngadalë.
Të zhgënjyer filluan t’i largonin mjetet.
Situata u kthye në normalitet.
Pas një pritje të gjatë një qytetar që po vinte nga Novi Sadi, u shpreh shumë i lumtur që mund të lëvizte i lirë.
“Ndjehem shumë i lumtur që rruga u hap. Duhet të lëvizim përpara, është e nevojshme që të qarkullojmë të lirë. Jam këtu më fëmijën tim edhe ai është shumë i lumtur. Po lëviz, mirupafshim”, tha një qytetar.
Pavarësisht që rruga u hap, forca të shumta policore vazhduan të qëndronin në Bërnjak.
Së bashku me ta ishin edhe pjesëtarët e KFOR-t, që po garantojnë për sigurinë e vendit.
Situata është kthyer në normalitet, dhe qytetarët tani mund të lëvizin lirë në pikën kufitare në Bërnjak.
Raporti i gazetarit Shpat Blakçori.
