KFOR-i ka njoftuar se në kampin Vrello është zhvilluar ushtrimi “Golden Sabre”, gjatë të cilit janë simuluar situata të ndryshme emergjente, përfshirë kontrollin e turmave dhe trazirave, evakuimin mjekësor përmes mjeteve ajrore, si dhe asgjësimin e sigurt të mjeteve shpërthyese dhe materialeve të rrezikshme.
Sipas njoftimit, ushtrimet janë zhvilluar në skenarë me intensitet të lartë dhe kompleksitet të shtuar, në bashkëpunim me pjesëtarë të Policisë së Kosovës dhe Misionit të Bashkimit Evropian për Sundimin e Ligjit në Kosovë (EULEX).
KFOR-i ka theksuar se trajnimet e përbashkëta janë thelbësore për të siguruar që kontingjentet shumëkombëshe të jenë të përgatitura për të bashkëvepruar dhe për të reaguar shpejt e me efektivitet në situata emergjente.
“Trajnimet e rregullta të përbashkëta janë thelbësore për të garantuar që kontingjentet tona shumëkombëshe të jenë fleksibile, të afta për të bashkëvepruar dhe të gatshme për të reaguar shpejt dhe me efektivitet në situata kur çdo sekondë ka rëndësi, në bashkëpunim të ngushtë me institucionet e tjera të sigurisë”, thuhet në njoftim.
KFOR-i ka ritheksuar përkushtimin për të kontribuar në krijimin e një mjedisi të sigurt dhe të qëndrueshëm për të gjithë njerëzit dhe komunitetet që jetojnë në Kosovë, në përputhje me mandatin e tij të Kombeve të Bashkuara.







