Gjykata Themelore e Prizrenit ia ka caktuar një muaj paraburgim Rrahman Hotit, si i dyshuar për vrasjen e Sylë Dakajt, në parkingun e një qendre tregtare në Suharekë.
Përveç veprës penale të vrasjes, Hoti është duke u ndjekur edhe për “posedim të paautorizuar të armëve”.
Megjithatë, siç merr vesh TËVË1 përmes disa burimeve, Rrahman Hoti vrasjen e kreu me një armë me leje.
Siç ka mësuar TËVË1, Hoti kishte leje nga shteti që armën e llojit ”Sig Sauer” modeli P320 kalibër: 9mm x 19, ta përdorte vetëm për qëllime shenjëtarie.
Rrahman Hotit iu lëshua leja për armë, përkundër që i njëjti ishte person i njohur për organet e rendit.
Para disa vitesh, Hoti u dëbua nga Zvicra, shtet në të cilin për 19 vite e vuajti dënimin me burgim, pas vrasjes së bashkëshortes.
Për çështjen e lëshimit të lejes për armë, TËVË1 ka dërguar pyetje edhe në ministrinë e punëve të brendshme, mirëpo deri më tani nuk ka pranuar përgjigje.
Armën e llojit “Sig Sauer”, Hoti këtë armë e kishte me vete edhe mesditën e 18 nëntorit, kur e kreu vrasjen e rëndë.
Sipas dosjes së Prokurorisë, Hoti e vrau Dakajn pas një mosmarrëveshjeje lidhur me parkimin e automjeteve, dhe ka vënë në rrezik edhe jetën e bashkëshortes së viktimës dhe vajzës së tyre të mitur.
I pandehuri ka shtënë disa herë me armën e zjarrit të llojit “Sig Sauer” në drejtim të viktimës, fillimisht përmes xhamit të automjetit dhe më pas duke vazhduar të gjuaj me armë në drejtim të tij, edhe pasi kishte hapur dyert e automjetit, duke e qëlluar në pjesë të ndryshme të trupit.
Si pasojë e plagëve, viktima, pas marrjes së ndihmës së parë mjekësore në QKMF në Suharekë, është dërguar për trajtim të mëtejmë në Spitalin Rajonal të Prizrenit, ku nga ana e mjekëve është konstatuar vdekja e tij.
Pas kryerjes së veprës, i pandehuri është larguar nga vendi i ngjarjes, ndërsa më pas është lokalizuar dhe arrestuar nga Policia e Kosovës.
Gjatë kontrollit të automjetit të të pandehurit, policia ka gjetur dhe sekuestruar armën e dyshuar si mjet të kryerjes së veprës penale, së bashku me dy karikatorë dhe 24 fishekë. Ndërsa, gjatë kontrollit të banesës së tij, janë gjetur dhe sekuestruar edhe 47 fishekë të tjerë.







