Pas 13 vitesh pritje, GTA 6 rikthen interesimin e madh për një nga videolojërat më të njohura në botë.
E vlerësuar me 99 pikë nga 100 të mundshme nga kritikët e videolojërave, ajo ka marrë vëmendje edhe për përmbajtjen e saj të dhunshme.
Në Kosovë, ekspertët paralajmërojnë prindërit që të kenë kujdes me fëmijët që luajnë këtë lojë.
“Niveli i hiperrealizmit brenda lojës është shumë real. Ky është problem, pra është problem për kategorinë e fëmijëve. Jemi duke folur për këputje të gjymtyrëve, për pëlcitjen e kokës në formë shumë reale. Unë, për mendimin tim, nuk kisha pasur qejf që fëmija im të ishte i ekspozuar”, thotw Darsej Rizaj-ekspert i teknologjisë
Ndikimin e videolojërave të tilla te fëmijët e shpjegon edhe sociologu Genc Xerxa.
“Është e dëmshme sidomos për një gjeneratë apo për një moshë kur janë në formim e sipër. Sistemi i tyre kognitiv, i njohjes së botës, fillon të stimulohet edhe të pranojë si të mirëqenë dhunën. Pra, kjo është e keqe”, thotw ai.
Eksperti i teknologjisë, Darsej Rizaj ka edhe një mesazh për prindërit.
“Mesazhi im është që prindërit të mos bien pre e presionit të fëmijëve, që zakonisht është presion social që kanë ndaj moshatarëve të tyre, që kanë me luajtur lojën. …..Rekomandimi im është që të bisedojnë me fëmijët edhe t’ua shpjegojnë që loja nuk ka përmbajtje për ta”, shprehet ai.
Ndërkohë, në GTA 6 do të jetë pjesë edhe këngëtarja shqiptare Dua Lipa.
Një nga këngët e saj është përfshirë në albumin muzikor që do të shoqërojë videolojën e shumëpritur.




