Ish-kryetari i Kuvendit të Kosovës, Jakup Krasniqi, është larguar nga shtëpia e tij në lagjen “Velania” në Prishtinë, pas disa orësh qëndrimi pranë familjes, në kuadër të ditës së dytë të vizitës së tij në Kosovë.
Krasniqi është larguar me automjetet e EULEX-it, nën masa të rrepta sigurie.
Vizita e Krasniqit në Kosovë është mundësuar nga Dhomat e Specializuara në Hagë për arsye të forta humanitare, për shkak të gjendjes shëndetësore të bashkëshortes së tij.
Edhe gjatë ditës së dytë, ai ishte sjellë nga zyrat e EULEX-it drejt shtëpisë së tij në Prishtinë, nën përcjelljen e masave të rrepta të sigurisë.
Raportohet se Krasniqi do të qëndrojë në Kosovë edhe dy ditë të tjera.
Dhomat e Specializuara kanë bërë të ditur se Trupi Gjykues ka udhëzuar Zyrën Administrative të organizojë një vizitë nën ruajtje për Krasniqin, për shkak të rrethanave të forta humanitare.
Ndryshe, më 16 shtator, Jakup Krasniqi është dënuar në shkallën e parë me 25 vjet burgim nga Dhomat e Specializuara të Kosovës në Hagë.




