Vëllai i Jakup Krasniqit, Dauti, është ankuar se nuk është lejuar nga Policia që ta takojë vëllain e tij, i cili të mërkurën ka arritur në Kosovë për një vizitë familjare për arsye shëndetësore të bashkëshortes.
Ai para gazetarëve ka shprehur shqetësimin për gjendjen shëndetësore të Krasniqit, duke thënë se disa nga analizat e tij kanë dalë keq.
Dauti është ankuar edhe për mungesën e veprimeve nga institucionet në mbështetje të vëllait të tij, i cili është dënuar nga Gjykata Speciale me 25 vjet burgim për krime lufte.
“Vajza e tij më tha se na e kanë ndaluar vizitën. I thashë jo, unë nuk po dua të prish. Vallahi, ligsht është, disa analiza i kanë dalë keq. Po thonë që Jakupi është nisur prej Hagës. Vallahi, asgjë nuk di. Djali më tha të dal në ballkon dhe, kur dola, e kishin bllokuar këtu. Çka po bëjmë ne për të? A po më kallëzon, a është dikush duke bërë diçka për të? Të bëfshim ne diçka, unë nuk e di”, ka thënë ai para gazetarëve.
Ndërkohë, Jakup Krasniqi ka arritur në shtëpinë e tij në Prishtinë, ku është pritur me përqafime nga familjarët.
Ekipi i Tëvë1 ka qëndruar pranë shtëpisë së Krasniqit dhe ka përcjellë nga afër momentin e mbërritjes së tij.
Krasniqi do të qëndrojë në shtëpinë e tij deri në orën 17:00.







