Në janarin e këtij viti Sekretari amerikan i Shtetit, Antony Blinken, i kishte dërguar një letër, kryeministrit të Kosovës, Albin Kurtit, në të cilën i kishte paraqitur synimet që administrata Biden i ka për Republikën e Kosovës.
Në këtë dokument që mban datën e 11 janarit, Blinken premton bashkëpunim për shumë çështje, në mesin e të cilave edhe dialogun me Serbinë.
“Si mik dhe partner i Kosovës, Shtetet e Bashkuara presin të bashkëpunojnë me ju për ta zbatuar plotësisht agjendën e Presidentit Biden të përcaktuar për marrëdhënien tonë, përfshirë fuqizimin e sundimit të ligjit, mbrojtjen e të drejtave të minoriteteve, nxitjen e rritjes ekonomike dhe sigurimin e marrëveshjes së vonuar prej kohësh ndërmjet Kosovës dhe Serbisë, me fokus në njohjen e ndërsjellë”.
Dialogu po ashtu ishte temë diskutimi edhe në takimin e së martës, mes Blinken, Osmanit dhe Kurtit.
Në një postim në twitter, pas këtij takimi, Sekretari amerikan tha se SHBA mbështet integrimin euroatlantik dhe ndërkombëtar të Kosovës dhe dialogun Kosovë-Serbi të lehtësuar nga BE.
Ndërsa kryeministri Kurti, përmes një postimi në Facebook, ka thënë se i ka konfirmuar sekretarit Blinken, përkushtimin e Kosovës në dialog.
“Në takim konfirmuam që Republika e Kosovës është e përkushtuar për arritjen e një marrëveshjeje ligjërisht të obligueshme që në qendër ka njohjen reciproke ndërmjet Kosovës dhe Serbisë dhe se deri më tani jemi angazhuar në mënyrë konstruktive dhe kreative në procesin e dialogut”, ka shkruar ai.
Këtë qëndrim të SHBA-së për përfundimin e dialogut me njohje të ndërsjellë mes dy vendeve, javëve të fundit kanë filluar ta potencojnë edhe mekanizmat brenda Bashkimit Evropian.
Raporti i gazetarit Valmir Gallopeni.