Përveç dëmeve të shkaktuara në komunat e Deçanit dhe Drenasit, erërat e forta gjatë natës së kaluar kanë shkaktuar dëme edhe në komunën e Istogut, ku është prekur edhe një biznes.
Pamjet e siguruara nga Tëvë1 tregojnë dëmet e shkaktuara në një biznes, ku vlera e humbjeve, sipas të dhënave paraprake, arrin në rreth 10 mijë euro.
Ndërkohë, ekipet emergjente komunale kanë qenë të angazhuara gjatë gjithë natës për menaxhimin e situatës dhe trajtimin e rasteve të shkaktuara nga moti i lig.
Në vendin e ngjarjes kanë dalë edhe zyrtarë të Komunës së Istogut dhe anëtarë të komisionit përkatës, të cilët kanë parë nga afër dëmet dhe kanë vlerësuar situatën.
Dëmet nga erërat e forta janë raportuar edhe në disa komuna të tjera të vendit, ndërsa ekipet përkatëse po vazhdojnë të jenë në terren.
