Ministrja e Mjedisit, Fitore Pacolli, ka zhvilluar një takim bilateral me ministrin e Bujqësisë dhe Pylltarisë së Turqisë, İbrahim Yumaklı, në kuadër të konferencës COP31, që po mbahet në Antalia të Turqisë.
Përmes një postimi në Facebook, Pacolli ka bërë të ditur se gjatë takimit është diskutuar për sigurinë ujore në Kosovë, si dhe për mundësitë e bashkëpunimit mes dy vendeve në fushën e burimeve ujore.
Ajo ka theksuar se siguria ujore është një nga prioritetet kryesore të ministrisë që drejton, duke bërë të ditur se Kosova është duke planifikuar ndërtimin e pesë digave strategjike.
Sipas Pacollit, përvoja dhe ekspertiza e Turqisë në ndërtimin dhe menaxhimin e digave mund të shërbejnë si mbështetje e rëndësishme teknike për realizimin e këtyre projekteve.
Po ashtu, në takim është diskutuar edhe Memorandumi i Mirëkuptimit, i cili pritet të nënshkruhet mes dy vendeve për bashkëpunim teknik në fushën e burimeve ujore, infrastrukturës së digave dhe menaxhimit të lumenjve.
“Turqia ka përvojë të gjatë në ndërtimin dhe menaxhimin e digave të mëdha, prandaj e shohim si një partner të çmuar në avancimin e projekteve tona dhe forcimin e sigurisë ujore në Kosovë”, ka vlerësuar Pacolli./teve1.info/
