Mbetje mortore janë gjetur sot në fshatin Brod të Komunës së Shtërpcës, gjatë vazhdimit të aktiviteteve të kërkimit në një lokacion të dyshuar për varr të mundshëm. Mbetjet do t’i nënshtrohen ekzaminimit mjekoligjor dhe identifikimit përmes analizës së ADN-së.
Komisioni Qeveritar për Persona të Zhdukur ka njoftuar se më 6 nëntor 2026, pas sigurimit të urdhrit përkatës gjyqësor, kanë filluar aktivitetet e kërkimit dhe gërmimet vlerësuese në një lokacion të dyshuar në fshatin Brod të Shtërpcës.
Sipas njoftimit, gjatë fazës së parë të kërkimeve nuk ishte arritur të lokalizohej varri i dyshuar, për shkak të ndryshimeve që kishte pësuar terreni ndër vite, të cilat kishin vështirësuar përcaktimin e vendndodhjes së saktë.
Megjithatë, gjatë vazhdimit të gërmimeve më 12 nëntor, janë gjetur mbetje mortore.
“Mbetjet mortore të gjetura do t’u nënshtrohen procedurave të mëtejshme të ekzaminimit mjekoligjor dhe identifikimit përmes analizës së ADN-së”, thuhet në njoftimin e Komisionit Qeveritar për Persona të Zhdukur.
Aktivitetet janë realizuar në koordinim ndërmjet Komisionit Qeveritar për Persona të Zhdukur, Institutit për Mjekësi Ligjore dhe Drejtorisë së Policisë për Hetimin e Krimeve të Luftës – Sektorit për Hetimin e Personave të Zhdukur, me përkrahjen e Prokurorisë – Departamentit për Krime Lufte.
Komisioni ka bërë të ditur se trajtimi i këtij lokacioni është rezultat edhe i bashkëpunimit rajonal, përfshirë komunikimet me Drejtorinë e Republikës së Kroacisë për Personat e Zhdukur gjatë Luftës Atdhetare.
Po ashtu, është theksuar rëndësia e bashkëpunimit me familjet e personave të zhdukur me dhunë, Këshillin Koordinues të Asociacioneve Familjare të të Zhdukurve të Kosovës dhe qytetarët që kanë kontribuar me informacione të rëndësishme për identifikimin e lokacionit.
Në fund, Komisioni Qeveritar për Persona të Zhdukur ka shprehur mirënjohje për të gjitha institucionet dhe qytetarët e përfshirë në këtë proces, duke ritheksuar përkushtimin për vazhdimin e përpjekjeve për ndriçimin e fatit dhe vendndodhjes së të gjithë personave të zhdukur me dhunë.
