Një qytetar në Gjakovë ka dorëzuar në Polici një portofol me para dhe dokumente personale, të cilin e kishte gjetur në rrugën “Bujar Roka”.
Sipas njoftimit të Policisë, qytetari L. Rudi më 12 nëntor është paraqitur në Stacionin Policor në Gjakovë, ku ka dorëzuar portofolin e gjetur.
Pas hapjes së portofolit në prani të zyrtarëve policorë, janë gjetur 656 euro e 95 cent, si dhe dokumente personale.
Policia ka arritur ta identifikojë pronarin përmes dokumenteve, të cilit më pas i janë kthyer paratë dhe dokumentet personale.
“Drejtoria Rajonale e Policisë në Gjakovë e falënderon qytetarin për ndershmërinë dhe bashkëpunimin, duke e cilësuar veprimin e tij si shembull pozitiv të përgjegjësisë qytetare”, shkruhet në njoftim.
