Deputetët e Kuvendit të Kosovës pritet të mblidhen nesër në një seancë të radhës, e cila është caktuar të fillojë në orën 10:00.
Sipas njoftimit të Kuvendit, në këtë mbledhje janë paraparë disa çështje për shqyrtim, përfshirë marrëveshje ndërkombëtare, programin e punës së Kuvendit për sesionin vjeshtor të vitit 2026, si dhe tema që lidhen me shëndetësinë dhe furnizimin me energji elektrike.
Fillimisht, deputetët do të shqyrtojnë miratimin e procesverbalit nga seanca e kaluar, ndërsa më pas do të vazhdojnë me deklarimet jashtë rendit të ditës dhe pyetjet parlamentare.
Në vazhdim të seancës janë paraparë për shqyrtim tri projektligje për ratifikimin e marrëveshjeve ndërmjet Kosovës dhe Suedisë. Ato kanë të bëjnë me ekstradimin, transferimin e personave të dënuar dhe ndihmën e ndërsjellë juridike në çështjet penale.
Po ashtu, në rend dite është edhe shqyrtimi i projektligjit për ratifikimin e Traktatit për Ndihmë të Ndërsjellë Juridike në Çështjet Penale ndërmjet Kosovës dhe Belgjikës.
Deputetët do të diskutojnë edhe Propozim-Programin e Punës së Kuvendit të Republikës së Kosovës për sesionin vjeshtor 2026.
Një nga pikat që pritet të tërheqë vëmendje është interpelanca me ministrin e Shëndetësisë, Arben Vitia, lidhur me vdekjen e pacientes me kancer të gjirit, e cila, sipas kërkesës për interpelancë, kishte mbetur katër muaj pa terapi, si dhe mungesën e barnave onkologjike.
Në fund të rendit të ditës është paraparë edhe shqyrtimi i mocionit përmbajtjesor lidhur me gjendjen në planifikimin, çmimin dhe furnizimin me energji elektrike në Kosovë.
Seanca pritet të mbahet në sallën e Kuvendit të Kosovës, duke filluar nga ora 10:00.
