Presidentja e Kosovës, Justina Shiroka-Pula, ka pritur në takim drejtorin e lartë për Evropë dhe Euroazi në Institutin Republikan Ndërkombëtar (IRI), Stephen B. Nix, me të cilin ka diskutuar për zhvillimin demokratik të Kosovës dhe bashkëpunimin me këtë institut.
Shiroka Pula ka vlerësuar kontributin e IRI-t në avancimin e demokracisë dhe forcimin e institucioneve demokratike, përfshirë mbështetjen për partitë politike, Kuvendin dhe fuqizimin e grave në politikë dhe vendimmarrje.
Sipas njoftimit të Presidencës, gjatë takimit është theksuar rëndësia e institucioneve funksionale, respektimit të ndarjes së pushteteve, pavarësisë së gjyqësorit dhe përgjegjësisë institucionale.
Palët kanë diskutuar edhe për zgjerimin e bashkëpunimit në edukimin demokratik, luftimin e dezinformimit, promovimin e debatit politik, si dhe çështjet që lidhen me sigurinë rajonale dhe perspektivën euroatlantike të Kosovës. /teve1.info/
