Qytetarët dhe bizneset në Kosovë do të mund të realizojnë transfere bankare brenda pak sekondash, 24 orë në ditë dhe 7 ditë në javë, përmes sistemit të ri të pagesave TIPS-K.
Banka Qendrore e Kosovës (BQK) ka njoftuar se nga 23 nëntori 2026 do të nisë zbatimi gradual i këtij sistemi, ndërsa nga 23 shkurti 2027 të gjitha bankat në vend do të jenë pjesëmarrëse.
Sipas BQK-së, gjatë periudhës tranzitore prej 3 muajsh, bankat do të përfshihen në mënyrë progresive, duke mundësuar ofrimin gradual të shërbimeve të pagesave të shpejta për qytetarët dhe bizneset.
Përgatitjet për funksionalizimin e sistemit kanë hyrë në fazën përfundimtare, pasi BQK-ja ka miratuar 2 udhëzues që plotësojnë kornizën rregullative për funksionimin e tij.
Udhëzuesi i parë përcakton kushtet e përdorimit të TIPS-K, mënyrën e funksionimit dhe tarifat që do të aplikohen për institucionet pjesëmarrëse.
Ndërkaq, udhëzuesi i dytë përfshin masat për parandalimin e pastrimit të parave, luftimin e financimit të terrorizmit dhe mbrojtjen nga mashtrimet financiare.
Këto masa synojnë menaxhimin e rreziqeve, identifikimin e transaksioneve të dyshimta dhe garantimin e pajtueshmërisë me kërkesat ligjore.
Miratimi i udhëzuesve vjen pas miratimit, muajin e kaluar, të Rregullores për Sistemin e Pagesave të Shpejta TIPS-K, duke finalizuar kornizën rregullative të nevojshme për funksionalizimin e tij.
Sistemi i ri do të mundësojë transferimin e mjeteve brenda pak sekondash, pa u kufizuar në orarin e zakonshëm të punës së bankave, përmes institucioneve pjesëmarrëse.
Sipas BQK-së, ky zhvillim është pjesë e reformave për modernizimin e infrastrukturës së pagesave në Kosovë, rritjen e efikasitetit dhe sigurisë, si dhe përafrimin me standardet evropiane.
Me përfundimin e periudhës tranzitore, më 23 shkurt 2027, shërbimi pritet të jetë i qasshëm për qytetarët dhe bizneset përmes të gjitha bankave në Kosovë.
