Përkundër se të gjitha mediumet italiane e kishin paralajmëruar Edon Zhegrovën startues në ndeshjen e Juventusit në udhëtim te Fiorentina, një gjë e tillë nuk ndodhi.
Juventusi barazoi 2:2 në Firencë, të dielën mbrëma në kuadër të kampionatit italian kurse Zhegrova në këtë përballje u aktivizua në gjysmë orën e fundit.
Ai u inkuadrua në minutën e 57-të, duke zëvendësuar sulmuesin gjerman Nick Ëoltemade kurse Juventusi me këtë barazim mbetet në pozitën e shtatë në Serie A me 18 pikë.
Zhegrova në sezonin aktual ka 2 gola e po aq asistime në nëntë paraqitje kampionale, por në asnjërën nuk ka qenë startues kurse është lënë edhe jashtë listës për Ligën e Evropës.
Trajneri Luciano Spalletti duket se ende nuk është bindur plotësisht nga Zhegrova për ta aktivizuar prej minutës së parë.
“Ndodhin gjëra si ato me Zhegrovën: e shikon ndeshjen e mëparshme dhe mendon se ai duhet të jetë titullar. Ndonjëherë ai luan mirë në gjysmë orën e fundit dhe ndonjëherë ai bën një gjë pak më mirë dhe një tjetër pak më keq. Nuk është kurrë plotësisht i ekuilibruar”, ka thënë Spalletti.
Aktualisht, Zhegrova është i grumbulluar me Kombëtaren e Kosovës për ndeshjet e këtij muaji në Ligën e Kombeve.
