Dogana e Kosovës, ka njoftuar se gjatë kontrolleve rutinore të automjeteve transportuese, në një kamion në hyrje të Pikës së Kalimit Kufitar në Vërmicë, ka zbuluar një sasi prej rreth 10 tonësh mallra të padeklaruara.
Sipas njoftimit vlera e mallit të padeklaruar vlerësohet të jetë rreth 154,000 dollarë amerikanë
Kamioni në fjalë, i cili sipas dokumentacionit kishte përfunduar procedurat doganore përmes deklaratës së pararritjes, është përzgjedhur për kontroll shtesë bazuar në parametrat e menaxhimit të riskut. Me këtë rast, zyrtari doganor ka kërkuar që automjeti t’i nënshtrohet kontrollit me skaner dhe matjes së peshës.
“Gjatë verifikimit në peshore janë evidentuar mospërputhje në peshën e deklaruar, përkatësisht një diferencë prej rreth 10 tonësh mallra të padeklaruara. Për këtë arsye, është kërkuar kontroll më i detajuar i ngarkesës. Vlera e mallrave të padeklaruara, pa përfshirë detyrimet e importit, vlerësohet të jetë rreth 154,000 dollarë amerikanë”, thuhet në komunikatë.
Dogana e Kosovës ka bërë të ditur se rasti është duke vazhduar me procedurat përkatëse administrative./teve1.info/
