Ministrja e Drejtësisë e Kosovës, Donika Gërvalla, është takuar me ministrin irlandez të Drejtësisë, Punëve të Brendshme dhe Migracionit, Jim O’Callaghan, me të cilin ka diskutuar për thellimin e bashkëpunimit ndërmjet dy vendeve në fushën e drejtësisë.
Sipas Gërvallës, në takimin dypalësh vëmendje e veçantë iu kushtua reformave në drejtësi, forcimit të sundimit të ligjit dhe luftës kundër korrupsionit dhe pandëshkueshmërisë.
Ajo bëri të ditur se me palën irlandeze është diskutuar edhe për avancimin e bashkëpunimit juridik ndërkombëtar në çështjet penale, përfshirë mekanizmat e ndihmës së ndërsjellë juridike, ekstradimin dhe transferimin e personave të dënuar.
Gërvalla ka theksuar rëndësinë e bashkëpunimit me agjencitë e Bashkimit Evropian në luftimin e korrupsionit dhe krimit të organizuar, si dhe mbështetjen e BE-së për zbatimin e reformave në drejtësi dhe procesin e integrimit evropian të Kosovës.
Përmes një postimi në Facebook, ministrja Gërvalla ka ritheksuar qëndrimin e saj lidhur me luftën kundër korrupsionit.
“Republika e Kosovës nuk bën kompromis me korrupsionin dhe pandëshkueshmërinë”, ka shkruar Gërvalla në Facebook./teve1.info/
