Numri i vizitorëve në hotelet e Kosovës ka shënuar rritje gjatë muajit shtator 2026, krahasuar me të njëjtën periudhë të vitit të kaluar.
Sipas të dhënave të Agjencisë së Statistikave të Kosovës (ASK), gjatë këtij muaji në hotelet e vendit janë regjistruar gjithsej 79 mijë e 154 vizitorë, që paraqet rritje prej 22.3 për qind në krahasim me shtatorin e vitit 2025.
Nga numri i përgjithshëm i vizitorëve, 29 mijë e 928 ishin vendorë, ndërsa 49 mijë e 226 të huaj.
ASK-ja ka bërë të ditur se rritje e konsiderueshme është shënuar edhe te numri i vizitorëve të huaj, i cili është rritur për 24.9 për qind krahasuar me shtatorin e vitit të kaluar, kur ishin regjistruar 39 mijë e 397 vizitorë të jashtëm.
Sa i përket prejardhjes së vizitorëve të huaj, Shqipëria prin me 8 mijë e 908 vizitorë, e ndjekur nga Gjermania me 5 mijë e 485, Zvicra me 4 mijë e 182 dhe Turqia me 3 mijë e 291 vizitorë.
Shqipëria prin edhe për nga numri i net-qëndrimeve, me gjithsej 14 mijë e 788 net-qëndrime. Pas saj renditet Gjermania me 8 mijë e 929, Zvicra me 5 mijë e 141 dhe Turqia me 4 mijë e 804 net-qëndrime.
Të dhënat janë publikuar nga Agjencia e Statistikave të Kosovës në kuadër të raportit për Statistikat e Hotelerisë për muajin shtator 2026.
