Me të përfunduar ndërrimin e pasditës, Jeton Isufi , zyrtar policor u nis nga Gjilani në ora 2 pas mesnatës.
E për nder të Ditës Memoriale për Policët e rënë në detyrë i bëri mbi 40 km vrapim.
Këtë aktivitet simbolik, ai thotë se e bëri në shenjë nderimi për policët që kanë humbur jetën.
“Kam mund me zgjedh ndonjë metodë që është më e lehtë, psh me bicikletë, mirëpo duke e marrë parasysh mundin që e kanë dhënë këta zyrtarë policorë, duke e marrë parasysh që e kanë dhanë edhe jetën, kam dashtë të bëjë diçka që është sa ma e vështirë për mua, në mënyrë që me më plotësu edhe mua për shkak që e kam bërë këtë veprimtari”, u shpreh ai.
Isufi tregoi edhe disa probleme të cilat i hasi, e që ia vështirësuan rrugëtimin.
“Aktiviteti ka qenë mjaftë i vështirë dhe sfidues, duke e marrë parasysh që ka munguar edhe shtegu për këmbësorë, ka qenë errësirë, dukshmëria shumë e vogël, gjithashtu edhe mbrëmë kam qenë në punë deri në ora 23 gjë që ma ka vështirësuar këtë vrapim”, shtoi ai.
Këtë të martë u shënua Dita Memoriale e Policëve të Rënë, në nderim të rënies së Enver Zymberit në veri të Kosovës, më 26 korrik të vitit 2011.
Raporti i gazetares Valëza Sylejmani.
