Analisti Visar Xani ka thënë se raportet ndërmjet kryeministrit Albin Kurti dhe zëvendëskryeministres, Donika Gërvalla nuk janë të mirë.
Ai ka thënë se duke u bazuar në informacionet që ka, mes dy figurave kryesore të koalicionit qeverisës ka krisje të raporteve.
Kjo situatë sipas tij, nuk garanton qeverisje afatgjate.
“Kam informata që ka krisje mes koalicionit. Nuk janë raportet e këndshme mes kryeministrit Kurti dhe zëvendëskryeministres Gërvalla. Situata nuk është shumë e qëndrueshme që do të kemi qeverisje katër vjeçare, por do të kemi zgjedhje strategjike”, ka thënë ai në emisionin “Këndi i Debatit” në Tëvë1.
Një tjetër arsyeje sipas tij pse vendi mund të shkojë në zgjedhje gjatë vitit të ardhshëm, janë problemet e brendshme në dy paritë më të mëdha opozitare, Partinë Demokratike të Kosovës dhe Lidhjen Demokratike.
“Trazirat në subjektet politike, PDK, LDK mund t’i garantojë z. Kurtit në 2027 fitimin e zgjedhjeve në mënyrë të sigurt madje edhe rritjen e numrit që mos me pas stresin e 62 votave. Nëse ka aq probleme të mëdha dhe nëse e sheh që PDK dhe LDK nuk e kanë rrugëdaljen, të jeni të sigurt që viti 2027 do të jetë vit i zgjedhjeve, për shkak që është strategjike për një parti politike me stabilizua qeverisjen dhe atëherë flasim për një mandat për 4 vjet”, tha Xani.
