Prokuroria Themelore në Gjakovë ka kërkuar masën e paraburgimit prej 30 ditësh ndaj V.C për shkak të dyshimit se ka shitur mbi 100 armë, ndërsa rastin e ka paraqitur si vjedhje.
Ai dyshohet se armët nga një poligon ua ka shitur D.P dhe L.U të cilët gjenden në arrati.
“Sipas kërkesës së prokurorisë, ndër të tjera, ceket se ekziston dyshim i bazuar se i pandehuri me inicialet V.C. nga fillimi i muajit tetor 2026 e deri më datë 30.10.2026 në Gjakovë, konkretisht në poligonin e armëve “T…”, me dashje dhe në kundërshtim me dispozitat ligjore në fuqi për armët dhe materiet plasëse, ka shitur në mënyrë të paautorizuar mbi 110 (njëqind e dhjetë) armë zjarri, të cilat dyshohet se i kishte në depon e poligonit të licencuar, personave me inicialet D.P. dhe L.U. të cilët aktualisht gjenden në arrati. Pas kësaj, i pandehuri rastin e ka raportuar në Policinë e Kosovës, duke pretenduar rrejshëm se armët e njëjta i ishin vjedhur”, thuhet nga Prokuroria.
Sipas Prokurorisë, me këto veprime i pandehuri me inicialet V.C., ka kryer veprat penale “Importi, eksporti, furnizimi, transportimi, prodhimi, këmbimi, ndërmjetësimi ose shitja e paautorizuar e armëve apo materieve plasëse” nga neni 364 par.2 lidhur me par.1 të KPRK-së dhe “Lajmërimi apo kallëzimi i rremë” nga neni 382 par.1 të KPRK-së
