Ministri për Punë, Familje dhe Vlerat e Luftës Çlirimtare, Andin Hoti, ka vizituar SOS Fshatrat e Fëmijëve në Kosovë, ku është njoftuar nga afër me shërbimet dhe programet që ofrohen për fëmijët pa përkujdesje prindërore dhe familjet në nevojë.
Gjatë vizitës, ministri Hoti është pritur nga drejtoresha nacionale e këtij institucioni, Nezahat Ramadani-Salihu, e cila e ka njoftuar për aktivitetet dhe shërbimet që ofron organizata.
Sipas njoftimit të ministrisë, Hoti ka rikonfirmuar përkushtimin për mbështetje institucionale dhe bashkëpunim në avancimin e politikave për mbrojtjen dhe mirëqenien e fëmijëve dhe familjeve.
Në kuadër të vizitës, ministri ka takuar edhe fëmijët që marrin përkujdesje në SOS Familje, duke u njohur nga afër me kushtet, aktivitetet dhe përkujdesjen që u ofrohet atyre.
