Kryetarja e Kuvendit të Kosovës, Albulena Haxhiu, ka kërkuar që Serbia të mbajë përgjegjësi për krimet e kryera gjatë luftës në Kosovë, pas konfirmimit të identitetit të mbetjeve mortore të tre personave nga “Grupi i Intelektualëve”.
Përmes një postimi në rrjetin social Facebook, Haxhiu ka kërkuar gjithashtu nga Serbia që të publikojë të gjitha të dhënat që posedon për fatin dhe vendndodhjen e personave të zhdukur, përfshirë lokacionet e varrezave të tjera masive.
“Serbia duhet të mbajë përgjegjësi për krimet e kryera dhe të bëjë publike të gjitha të dhënat që posedon për vendndodhjen e personave të zhdukur, përfshirë lokacionet e varrezave të tjera masive”, ka shkruar Haxhiu.
Ajo ka bërë të ditur se analizat e reja të ADN-së nga zhvarrosjet në Kalludër dhe Jabukë kanë konfirmuar se mbetjet mortore të gjetura në këto lokacione u përkasin Adem Ademit, Fatmir Fazliut dhe Ali Halitit.
Sipas Haxhiut, familjet e tyre kanë pritur për më shumë se 27 vjet për të mësuar për fatin dhe vendndodhjen e trupave të më të dashurve të tyre.
Në fund, kryetarja e Kuvendit ka shprehur ngushëllime për familjet Ademi, Fazliu dhe Haliti, si dhe solidaritet me familjet e tjera që ende presin të mësojnë për fatin e të afërmve të zhdukur me dhunë gjatë luftës së fundit në Kosovë.
“Për më shumë se 27 vjet, familjet e tyre kërkuan të dinin se ku ishin trupat e më të dashurve të tyre. Forcat serbe i kishin vrarë dhe varrosur fshehurazi, me qëllim që të zhduknin gjurmët e krimit. Shpreh ngushëllimet e mia më të sinqerta për familjet Ademi, Fazliu dhe Haliti. Bashkëndjej me to, por edhe me familjet e tjera të këtij grupi dhe me të gjitha familjet në Kosovë që ende presin të mësojnë se ku ndodhen më të dashurit e tyre, të zhdukur me dhunë gjatë luftës së fundit”, ka deklaruar ajo.
Ndryshe, analizat e ADN-së konfirmuan identitetin e tre personave të zhdukur gjatë luftës në Kosovë, mbetjet mortore të të cilëve u gjetën gjatë gërmimeve në Kalludër dhe Jabukë, në veri të vendit.
Bëhet fjalë për Adem Ademin, Fatmir Fazliun dhe Ali Halitin, pjesëtarë të të ashtuquajturit “Grupi i Intelektualëve”, të cilët u zhdukën në prill të vitit 1999, në zonën e Zubin Potokut.
Identifikimin e tyre e bëri të ditur kryeministri i Kosovës, Albin Kurti, i cili tha se për rezultatet ishte njoftuar nga Komisioni Qeveritar për Persona të Zhdukur./teve1.info/
