Me mbesën për dore, ky gjysh po largohet nga shkolla “Faik Konica” në Prishtinë.
Mirëpo, prej disa ditësh, Avdi Tmavën po e përcjellë një shqetësim.
Ngrohja në klasën ku mëson mbesa e tij, është jashtë funksionit.
“A po e sheh që është mërdhi qika. Kqyre durt akull i ka si mundet kjo me marr mësim me këto kushte. Kjo është tmerr… Çfarë shteti është ky që i len fëmijët pa nxemje, kjo është tmerr. Këtu urgjent duhet me u ndërmmar masa edhe mos me i lon fëmijët me u mërdhi. Qysh me i pru na në shkollë kështu na me këto kushte katastrof”, tha Tmava.
Në kushte anonimiteti, shqetësimin për TËVË1, e ka ndarë edhe një nxënës.
“Po shumë e kena ftoft edhe po duhet me vesh jaknen se hala nuk i kan rregullu e po duhet me vesh. Krejt klasa po duhet me vesh jakne”, u shpreh një nxënës.
Nga shkolla Faik Konica e pranuan se ngrohja akoma nuk është funksionalizuar për klasat nga një deri në pesë.
Mirëpo, zëvendësdrejtoresha, Kosovare Leci, thotë se mësimi po zhvillohet me orar të rregullt.
“Ngrohja ende nuk është funksionalizuar këtë vit shkollor, për shkak të punimeve në kuadër të projektit të efiçiencës së energjisë, përkatësisht vendosjes së valvulave dhe termokokave të radiatorëve. Drejtoria Komunale e Arsimit është duke u angazhuar në përpjekjet për zgjidhjen sa më të shpejtë të kësaj situate, por ende nuk kemi një afat të konfirmuar për funksionalizimin e ngrohjes. Ndërkohë, gjendja është stabile dhe e menaxhueshme, ndërsa procesi mësimor po zhvillohet me orar të rregullt”, ka njoftuar Leci.
Me këtë problem, drejtoria e Arsimit e konfirmoi për TËVË1 se po përballen dhjetë shkolla në Prishtinë.
Fajin, drejtori Arianit Elshani, ia lë ministrisë së financave.
“Nuk bëhet fjalë për shumicën e shkollave, bëhet fjalë për 10 shkolla të Prishtinës, të cilat e kanë këtë sfidë aktuale, për shkak të bllokimit të mjeteve financiare nga Ministria e Financave. Ka pasur disa iniciativa nga Drejtoria e Transformimit që ta menaxhojë këtë proces, duke përfshirë të gjithë aktorët relevantë, të cilët janë në kuadër të këtij procesi, për t’i dhënë një rrugë, për t’i dhënë një zgjidhje dhe, fatkeqësisht, deri më sot, pra, nuk kemi një zgjidhje, kemi një bllokadë dhe kemi një, në këtë rast dhe një një viktimë, që janë, fatkeqësisht, janë nxënësit tanë, janë fëmijët tanë, janë qytetarët e Prishtinës që ballafaqohen me mungesë të ngrohjes në shkollat dhe çerdhet e Prishtinës”, u shpreh Elshani.
Si shkak i kësaj bllokade, Elshani thotë se janë bllokuar edhe dy projekte të tjera.
“Shkolla Ismail Qemali dhe Hasan Prishtina janë dy shkolla të cilat si Drejtori Komunale e Arsimit kemi kërkuar që me u rregullu në kuptimin e termoozolimit, në aspektin e dyshemesë, në aspektin e ngrohjes, në aspektin e drejtorëve, në aspektin e çatisë në këtë rast, kurmit të shkollave, që kanë nevojë imediate, pra, që të gjithë qytetarët ankohen në raport me gjendjen e këtyre dy shkollave, dhe që të dy shkollat kanë qenë në listën për renovim nga ky, ky fond i bllokuar tashmë”, u shpreh tutje Elshani.
Për këtë çështje, televizioni është në pritje edhe të përgjigjeve nga ministria e financave, të cilëve u është drejtuar me pyetje gjatë ditës.
