Për rreth katër vjet, Veton Elshani shërbeu si zëvendësdrejtor i Policisë për rajonin e veriut.
Mirëpo, ai nuk do ta ushtroj më këtë deytyrë.
Elshani është caktuar në pozitën e udhëheqësit të Departamentit të Policisë Kufitare.
“Ne bazë të kërkesës dhe të nevojës operative dhe kërkesës të drejtorit të përgjithshëm të Policisë, Fehmi Hoti, u.d., unë jam caktuar me detyrë udhëheqës i Departamentit të Policisë Kufitare”, ka thënë Elshani.
Elshani thotë se paraprakisht nuk ishte informuar për këto ndryshime.
Megjithatë, ai tregon se prej një viti kishte kërkuar të caktohej në një pozitë tjetër.
“Jo, nuk kam qenë i informuar, edhe pse unë qe një vit e këndej kam kërkuar me pas pozitë tjetër, për arsye që kam konsideruar që është përfunduar puna jonë, së paku puna shumë e madhe që është bërë në veri të vendit. Mirëpo, kjo për mua është promovim në rregull, është shumë mirë”, u shpreh tutje Elshani.
Në vend të tij, pritet të emërohet Petrit Fejza, i cili deri më tani ishte shef i operativës në rajonin e veriut.
Por, ky nuk është ndryshimi i vetëm në strukturat drejtuese të Policisë së Kosovës.
Ndryshime pritet të ketë edhe në disa departamente dhe drejtori rajonale.
Ish-drejtori i Policisë, Rashit Maliqi, i konsideron të mirëseardhura këto lëvizje. Megjithatë, ai thotë se krahas transferimeve, duhet të ketë edhe gradime të reja.
“Unë do të isha i lumtur sikur të kishte pasur gradime të reja. Procesi i gradimit në Policinë e Kosovës ka stagnuar shtatë vitet e fundit. Nuk kemi asnjë zyrtar policor që është avancuar në gradë. Është e vërtetë që gjeneratat e vjetra janë lëvizur nëpër pozita. Nëse janë bërë për çështje profesionale, janë të mira”, ka thënë Maliqi.
Ndryshime do të ketë edhe në Departamentin e Hetimeve.
Agron Nezaj do të largohet nga drejtimi i këtij departamenti, i cili është përgjegjës për hetimin e kriminalitetit, përfshirë krimin e organizuar dhe veprat e tjera të rënda penale.
Edhe Afërdita Mikullovci nuk do të jetë më në krye të Drejtorisë Rajonale të Policisë në Mitrovicën e Jugut.
Ajo këtë pozitë e mban që nga viti 2018. Ndërsa tash pritet të transferohet në strukturat e trafikut rrugor.
Ish-zëvendësministri i Punëve të Brendshme, Selam Shkodra, thotë se ndryshimet mund të ndikojnë në rritjen e përgjegjësisë në menaxhimin policor.
“Ndryshimet e fundit munden me shtu përgjegjësi edhe me kriju përgjegjësi të reja në menaxhmentin e ri, i cili po përshkruhet sipas detyrës së punës”, tha Shkodra.
Ndryshim në pozitë ka edhe për kolonel Luan Kekën.
Ai është emëruar drejtor rajonal i Policisë në Gjilan. Deri më tani, Keka ka udhëhequr Drejtorinë Kundër Terrorizmit.
Ndërkohë, Departamentin e Hetimeve pritet ta udhëheqë Fehmi Xhata, atë të Inteligjencës Arben Paqarizi, ndërsa Departamentin e Burimeve Njerëzore kolonel Agron Rukiqi.
Kurse, Departamenti i Shërbimeve Mbështetëse do të drejtohet nga kolonel Kamer Januzaj.
