Ministria e Industrisë, Ndërmarrësisë, Tregtisë dhe Inovacionit ka bërë të ditur se, nën koordinimin e Inspektoratit Qendror të Mbikëqyrjes së Tregut (IQMT), ka nisur një aksion i përbashkët me Policinë e Kosovës, Administratën Tatimore të Kosovës (ATK) dhe Autoritetin Rregullativ të Komunikimeve Elektronike dhe Postare (ARKEP), me qëllim të mbikëqyrjes së produkteve që tregtohen përmes platformave online.
Sipas njoftimit, aksioni është përqendruar në inspektimin e produkteve që transportohen drejt konsumatorëve përmes shërbimeve postare, me fokus të veçantë në verifikimin e ligjshmërisë së veprimtarisë së bizneseve që ushtrojnë shitjen online.
Gjatë inspektimeve po verifikohet nëse bizneset janë të regjistruara në Agjencinë për Regjistrimin e Bizneseve të Kosovës (ARBK), nëse për produktet e shitura lëshohen kuponë fiskalë, si dhe nëse ato shoqërohen me deklaracionin përkatës të prejardhjes dhe dokumentacionin e kërkuar ligjor.
Në kuadër të këtij aksioni, gjatë ditës janë angazhuar 11 ekipe inspektuese, të cilat kanë vepruar në tetë komunat kryesore të Kosovës.
Sipas rezultateve preliminare, janë realizuar gjithsej 23 inspektime, prej të cilave gjashtë lëndë janë përfunduar, ndërsa 17 të tjera mbeten në procedurë.
“Inspektorati Qendror i Mbikëqyrjes së Tregut, në bashkëpunim me institucionet partnere, do të vazhdojë aktivitetet e tilla me qëllim të garantimit të konkurrencës së drejtë, mbrojtjes së konsumatorëve, parandalimit të praktikave të paligjshme tregtare dhe sigurimit të zbatimit të legjislacionit në fuqi”, thuhet në njoftim.teve1.info/
