Instituti Kombëtar i Shëndetësisë Publike të Kosovës (IKShPK) ka njoftuar se gjatë javës së fundit në Kosovë janë regjistruar 27 raste të reja me fruth, duke e çuar në 269 numrin e përgjithshëm të rasteve të konfirmuara që nga 16 prilli deri më 1 nëntor 2026.
Sipas të dhënave të IKShPK-së, rastet janë regjistruar në 23 komuna të Kosovës, ndërsa pjesa dërrmuese e të prekurve janë fëmijë.
Instituti ka bërë të ditur se mbi 95 për qind e rasteve të konfirmuara u përkasin personave të pavaksinuar me vaksinën MMR, e cila mbron nga fruthi, parotiti dhe rubeola.
IKShPK-ja ka theksuar se vaksinimi mbetet masa kryesore për parandalimin e sëmundjes dhe kufizimin e përhapjes së saj.
“Fruthi është sëmundje shumë ngjitëse, e cila mund të shkaktojë komplikime serioze, veçanërisht te fëmijët e vegjël. Vaksinimi me kohë i mbron fëmijët nga kjo sëmundje dhe ndihmon në mbrojtjen e komunitetit, përfshirë foshnjat dhe personat që, për arsye shëndetësore, nuk mund të vaksinohen”, thuhet në njoftim.
Ndërkohë, në bashkëpunim me institucionet shëndetësore, IKShPK-ja është duke vazhduar edhe aktivitetet e vaksinimit plotësues për fëmijët që nuk janë vaksinuar ose nuk i kanë marrë të dyja dozat e parapara.
Gjatë këtij viti, përmes këtyre aktiviteteve, sipas IKShPK-së janë vaksinuar mbi 4 mijë e 6 fëmijë të grupmoshës 2 deri në 5 vjeç.
Instituti u ka bërë thirrje prindërve që të kontrollojnë statusin e vaksinimit të fëmijëve të tyre dhe, në rast se kanë mungesa në dozat e vaksinës, të kontaktojnë ekipet përkatëse të vaksinimit.
IKShPK-ja ka theksuar se mbrojtja e fëmijëve përmes vaksinimit në kohë është përgjegjësi e përbashkët e prindërve, profesionistëve shëndetësorë dhe institucioneve.
“Asnjë fëmijë nuk duhet të mbetet i pambrojtur për shkak të vaksinimit të vonuar ose të papërfunduar. Vetëm përmes bashkëpunimit të prindërve, profesionistëve shëndetësorë dhe institucioneve mund të rritet mbrojtja e fëmijëve dhe të ndërpritet përhapja e fruthit. Vaksinimi është e drejtë dhe përgjegjësi e përbashkët. Mbrojtja e çdo fëmije fillon me vaksinimin në kohë. Vaksinimi i rregullt + vaksinimi plotësues = fëmijë të mbrojtur”, theksohet në njoftimin e institutit./teve1.info/
