Ora 16:00 shënoi fillimin e protestës në Prishtinë.
Edhe në ditën e tretë qindra qytetarë, aktivistë dhe protestues të tjerë u mblodhën në sheshin “Zahir Pajaziti”.
Krejt kjo, për të kërkuar drejtësi për Arlinda Zekajn, e cila u vra nga kunati i saj në Vitomiricë të dielën mbrëma.
Nga sheshi ku u grumbulluan, protestuesit nisën marshimin drejt institucioneve.
Ndalesa e parë ishte Ministria e Drejtësisë.
Para këtij dikasteri protestuesit hodhën mjete tymuese.
E më pas, marshimi vazhdoi drejt Stacionit Policor “Qendra” në Prishtinë.
Edhe këtu, kërkuan drejtësi për Arlindën e ndjerë.
Pas kësaj, protestuesit kërkuan që protesta të vazhdonte edhe para shtëpive të zyrtarëve policorë të suspenduar.
Këtu protestuesit thanë se nuk e kanë ndërmend të heqin dorë nga kërkesat e tyre.
Nga Stacioni Policor, më kërkesa të njëjta u vazhdua drejt Prokurorisë.
Ndalesa e fundit e protestuesve të premten ishte para ndërtesës së Qeverisë së Kosovës, ku u ngrit edhe një tendë për të qëndruar protestuesit.
