Policia e Kosovës ka suspenduar 11 zyrtarë policorë në lidhje me trajtimin e rastit të Arlinda Zekajt, e cila u vra më 25 tetor në Vitomiricë të Pejës. Suspendimet janë bërë pas rekomandimit të Inspektoratit Policor të Kosovës, ndërsa ndaj zyrtarëve po zhvillohet hetim paraprak për veprimet ose mosveprimet e tyre në këtë rast.
Në njoftimin zyrtar, Policia e Kosovës bëri të ditur se vendimi për suspendimin e zyrtarëve është marrë në bazë të legjislacionit në fuqi dhe rekomandimit të IPK-së.
Të suspenduarit përfshijnë ushtruesin e detyrës së drejtorit rajonal të Policisë në Pejë, shefin e Hetimeve Rajonale, komandantin dhe zëvendëskomandantin e Stacionit Policor në Pejë, si dhe shefin e Sektorit të Hetimeve dhe ushtruesin e detyrës së shefit të Sektorit të Operativës në këtë stacion.
Po ashtu, janë suspenduar komandanti i Nënstacionit Policor në Vitomiricë dhe katër hetues policorë të Stacionit Policor në Pejë.
Sipas Policisë, hetimi nga Inspektorati Policor i Kosovës ka të bëjë me veprimet dhe mosveprimet e zyrtarëve gjatë trajtimit të rastit të Arlinda Zekajt.
“Suspendimet janë bërë në interes të hetimeve të pavarura, llogaridhënies institucionale dhe përgjegjësive individuale në trajtimin e rastit”, thuhet në njoftimin e Policisë së Kosovës.
Policia ka theksuar se mbetet e përkushtuar në ruajtjen e integritetit institucional dhe në ofrimin e shërbimeve të drejta e të paanshme, duke bërë të ditur se do të bashkëpunojë ngushtë me të gjitha institucionet relevante për trajtimin e këtij rasti.
