Deputetja e LDK-së, Hykmete Bajrami, ka kërkuar sqarime për humbjen potenciale të mjeteve nga Plani i Rritjes.
Në seancën e sotme të Kuvendit, ajo i ka drejtuar pyetje kryeministrit Albin Kurti, i cili ka munguar. Në mungesë të tij, Bajrami ka kërkuar përgjigje nga përfaqësuesit e kabinetit qeveritar për shumën që rrezikohet dhe përmbushjen e reformave.
Sipas saj, deklaratat e kryeministrit Albin Kurtit dhe të Jeton Zulfajt kanë përmendur shifra të ndryshme, prej rreth 40 milionë deri në 60 milionë euro. Deputetja ka kërkuar gjithashtu të sqarohet nëse 6 nga 13 hapat e reformave kanë mbetur të papërmbushur brenda afatit të 30 qershorit.
“Unë kam ngritë çështjen e humbjes potenciale të mjeteve nga Plani I rritjes. Konsideroj dhe besoj që Qeveria edhe pse nuk po e bën publike, tashmë e ka raportin e Komisionit Evropian për vlerësimin e përmbushjes së reformave në kuadër të agjendës për reforma ekonomike. Kemi dëgjuar deklarata të ndryshme edhe nga zotri Zulfaj dhe kryeministri Kurti për humbjen potenciale, ku njëri thotë 60 milionë euro, tjetri thotë rreth 40 milionë euro. Unë edhe sot, meqenëse kryeministri nuk është prezent, kërkoj nga përfaqësuesit e kabinetit qeveritar t’I tregojnë qytetarëve të Kosovës se sa ka humbur Kosova, meqenëse 6 nga 13 reformat nuk janë përmbushur në afatin e 30-të qershorit. Sa milionë euro ka humbur Kosova? Mos të harrojmë edhe një herë që në mandatin e kaluar për 960 ditë, ne kemi qenë nën masa ndëshkuese nga bashkësia evropiane dhe janë qindra miliona euro projekte të humbura dhe të shtyra për shkak të moskordinimit të duhur me aktërët e bashkësisë ndërkombëtare. Atëherë sa është shuma e mjeteve të humbura dhe saktësisht a qëndron ajo që 6 nga 13 hapat e reformave nuk janë përmbushur dhe a ndeheni përgjegjës për këtë”, theksoi Bajrami.
Ndonëse, Bajrami nuk mori përgjigje nga Kurti e as nga kabineti i tij në këtë seancë.
