Juristja e medias, Flutura Kusari, ka kritikuar vendimin e Gjykatës së Apelit për ta mbajtur të mbyllur për publikun seancën ku do të shqyrtohen ankesat ndaj aktgjykimit për vrasjen e Liridona Ademajt.
Në shkallën e parë, Naim Murseli, Granit Plava dhe Kushtrim Kokalla u shpallën fajtorë dhe u dënuan për vrasjen e Ademajt, më 29 nëntor 2023.
Kusari ka vlerësuar se nuk ekzistojnë arsye ligjore për mbylljen e seancës, duke theksuar se rasti është trajtuar publikisht edhe gjatë procesit gjyqësor në shkallën e parë.
Sipas saj, vendimi për të mos lejuar publikun në seancën e Apelit dëmton transparencën dhe besimin në drejtësi.
Ajo ka theksuar gjithashtu se Gjykata e Apelit duhej ta shfrytëzonte këtë rast për të dëshmuar përkushtimin institucional në trajtimin e rasteve të femicidit dhe mbrojtjen e grave.
Kusari ka paralajmëruar se mungesa e transparencës mund të krijojë perceptimin se rastet e vrasjes së grave nuk trajtohen me transparencën e nevojshme.
