Qendra për Studime Universitare e Forcës së Sigurisë së Kosovës ka përmbyllur me sukses garën ndërkombëtare “Triumfi Dardan”, e cila këtë vit shënoi pjesëmarrjen më të madhe deri më tani, me 40 oficerë kadetë nga shtetet anëtare të NATO-s.
Përgjatë kësaj gare, kadetët përshkuan 52 kilometra në terren të vështirë, me pajisje prej 35 kilogramësh, duke realizuar pesë misione ushtarake brenda 22 orëve pa ndërprerje.
Ministri i Mbrojtjes, Ejup Maqedonci tha se kjo garë dëshmoi përgatitjen, qëndrueshmërinë dhe aftësitë profesionale të liderëve të ardhshëm ushtarakë.
“Ndërkombëtarizimi i Qendrës për Studime Universitare mbetet një nga prioritetet tona në kuadër të avancimit të edukimit ushtarak. Përmes marrëveshjeve me akademi prestigjioze, bursave dhe pjesëmarrjes në aktivitete ndërkombëtare, po krijojmë mundësi të reja për zhvillimin profesional të kadetëve tanë. Përgëzoj komandanten e QSU-së, Major Mimoza Budeci, stafin dhe të gjithë kadetët për organizimin dhe përfaqësimin dinjitoz, duke dëshmuar edhe një herë se FSK-ja po konsolidohet si një forcë profesionale dhe partnere e besueshme ndërkombëtare”, ka shkruar ai./teve1.info/
