Auditorja e Përgjithshme e Kosovës, Vlora Mehmeti Spanca, ka kërkuar zbatimin urgjent të rekomandimeve të auditimit për trajtimin e rasteve të dhunës në familje, pas vrasjes së Arlinda Zekajt në Pejë.
Përmes një reagimi në Facebook, Mehmeti Spanca ka vlerësuar se vrasja e Zekajt, e cila kishte raportuar dhunë në familje dhe kishte kërkuar mbrojtje nga institucionet, është thirrje urgjente për reflektim dhe llogaridhënie institucionale.
Ajo ka rikthyer në vëmendje gjetjet e raportit të auditimit të performancës të Zyrës Kombëtare të Auditimit, “Efektiviteti i institucioneve në trajtimin e rasteve të dhunës në familje”, për periudhën 2020–2022.
Sipas saj, raporti kishte evidentuar mangësi në koordinimin ndërinstitucional, hetimin e rasteve, monitorimin e urdhrave mbrojtës dhe përfshirjen e mbrojtësve të viktimave.
Po ashtu, ishin identifikuar probleme në regjistrimin e rasteve, mbështetjen sociale dhe ekonomike të viktimave, vonesa në trajtimin gjyqësor dhe mungesë programesh për trajtimin e kryerësve të dhunës.
“Shpesh rekomandimet e auditimit shihen vetëm si mangësi procedurale, por ato lidhen drejtpërdrejt me aftësinë e sistemit për identifikimin e rreziqeve, reagimin në kohë dhe mbrojtjen e personave që kërkojnë ndihmë”, ka shkruar Mehmeti Spanca.
Auditorja e Përgjithshme ka theksuar se rekomandimet duhet të zbatohen me urgjencë, përgjegjësi dhe transparencë.
Ajo ka kërkuar vlerësim sistematik dhe profesional të rrezikut në çdo rast të raportuar, si dhe koordinim efektiv ndërmjet Policisë, Prokurorisë, Gjykatave, Zyrës për Mbrojtje dhe Ndihmë Viktimave dhe Qendrave për Punë Sociale.
Mehmeti Spanca ka theksuar gjithashtu nevojën për monitorim të vazhdueshëm të urdhrave mbrojtës, reagim të menjëhershëm ndaj shkeljeve dhe trajtim me prioritet të rasteve të dhunës.
Sipas saj, viktimave duhet t’u sigurohet mbështetje e vazhdueshme, përfshirë strehimin, përkrahjen sociale dhe ekonomike, si dhe shërbimet e specializuara. “Çdo raportim për dhunë duhet të merret seriozisht, çdo paralajmërim për rrezik duhet të vlerësohet dhe çdo masë mbrojtëse duhet të zbatohet e monitorohet”, ka theksuar ajo.
Reagimi i Mehmeti Spancës vjen pas vrasjes së Arlinda Zekajt në Vitomiricë të Pejës, më 25 tetor, rast që ka nxitur reagime dhe kërkesa për hetimin e veprimeve të institucioneve përgjegjëse.
Kryeprokurori i Shtetit ka kërkuar raport të detajuar nga Prokuroria Themelore në Pejë dhe Policia e Kosovës lidhur me trajtimin e rastit
