Deputeti i Aleancës, Burim Ramadani ka reaguar lidhur me kthimin e Ligjit për Specialen nga presidentja, duke pretenduar se Kuvendi nuk mund të bëjë ndryshime në përmbajtjen e tij, por vetëm të vendosë nëse do ta rrëzojë veton.
Përmes një reagimi, Ramadani ka thënë se për ta përmbysur veton e presidentes nevojiten 61 vota të deputetëve, ndërsa nëse ky numër nuk sigurohet, sipas tij, ligji nuk do të ekzistojë më dhe procesi do të duhej të niste nga fillimi.
“Kuvendi me 61 vota mund ta përmbys veton e Presidentes. Në këtë rast, Ligji hyn në fuqi pa asnjë pikë ndryshimi!”, ka shkruar Ramadani.
Ai ka kundërshtuar interpretimet se ligji është kthyer për t’u përmirësuar, duke i cilësuar ato si të pavërteta.
“Kush thotë që Ligji është kthyer për t’u përmirësuar, po fsheh të vërtetën. Thjesht, po mashtron!”, ka deklaruar Ramadani.
Në fund të reagimit, deputeti i Aleancës ka theksuar se sipas tij, nëse ligji nuk merr mbështetjen e nevojshme për rrëzimin e vetos, procesi duhet të nisë nga pika zero./teve1.info/
