Kryetarja e Kuvendit të Kosovës, Albulena Haxhiu, ka deklaruar se seanca e sotme plenare është karakterizuar nga diskutime për çështje politike dhe me interes publik, si dhe nga shkëmbimi i pyetjeve dhe përgjigjeve ndërmjet deputetëve dhe kabinetit qeveritar.
Përmes një postimi në rrjetin social Facebook, Haxhiu ka theksuar se gjatë seancës janë trajtuar një sërë çështjesh, ndërsa është miratuar edhe formimi i Komisionit Ad Hoc për përzgjedhjen e kandidatëve për Bordin e Radiotelevizionit të Kosovës.
“Kuvendit po i rikthehet gjallëria. Në seancën e sotme u ngritën dhe u sqaruan një sërë çështjesh politike dhe me interes publik, përmes deklarimeve të grupeve parlamentare dhe shkëmbimit të pyetjeve e përgjigjeve mes deputetëve dhe kabinetit qeveritar”, ka shkruar Haxhiu.
Ajo ka bërë të ditur se Komisioni Ad Hoc do të merret me përzgjedhjen e kandidatëve për katër pozita në Bordin e RTK-së, prej të cilave dy janë të rezervuara për komunitetin shqiptar, një për komunitetin serb dhe një për komunitetet e tjera joshumicë.
Sipas Haxhiut, kompletimi i Bordit të transmetuesit publik është i rëndësishëm, ndërsa Kuvendi do të angazhohet që procesi i përzgjedhjes të zhvillohet në kohë dhe në mënyrë transparente.
“Gjatë seancës u formua Komisioni Ad Hoc për përzgjedhjen e kandidatëve për Bordin e Radiotelevizionit të Kosovës (RTK), për katër pozita, dy për komunitetin shqiptar, një për komunitetin serb dhe një për komunitetet e tjera joshumicë. Si transmetues publik RTK-ja duhet të ketë një Bord të kompletuar, dhe Kuvendi do të angazhohet që procesi i përzgjedhjes së kandidatëve të zhvillohet me kohë dhe në mënyrë transparente”, ka shkruar ajo.
Kuvendi i Kosovës e miratoi formimin e këtij komisioni me 80 vota për, pa asnjë votë kundër dhe pa asnjë abstenim.
