Kryetari i Aleancës, Ardian Gjini, ka mbajtur një takim të rregullt të Kolegjiumit të Drejtorëve, ku së bashku me drejtorët komunalë nga radhët e këtij subjekti ka diskutuar për organizimin dhe funksionimin e brendshëm të Aleancës.
Sipas njoftimit të Aleancës, në takim është diskutuar edhe për zhvillimet e fundit politike në vend dhe për rolin e subjektit në raport me qytetarët.
Gjini ka theksuar se Aleanca do të angazhohet për mbrojtjen e qytetarëve nga, siç e ka cilësuar ai, abuzimi me pushtetin nga niveli qendror.
Gjatë takimit, ai u ka bërë thirrje drejtorëve komunalë që të tregojnë përkushtim në punën e tyre dhe të jenë korrektë në raport me qytetarët.
“Ai i nxiti drejtorët komunalë të jenë të saktë në punë dhe korrektë me qytetarët”, thuhet në njoftimin e Aleancës.
Sipas AAK-së, krahas takimeve të rregullta me strukturat e partisë, Gjini do të vazhdojë edhe takimet në terren me qytetarët, me qëllim të prezantimit të platformës politike dhe vizionit të Aleancës për zhvillimin e vendit.
