Dy persona janë arrestuar dhe ndaluar për 48-orë pas një operacioni të zhvilluar mbrëmë nga Drejtoria për Hetimin e Trafikimit me Narkotikë – Sektori Qendror në koordinim me Prokurorinë Themelore Gjilan.
Në këtë aksion siç ka njoftuar Policia e Kosovës janë sekuestruar edhe mbi 50 kilogramë marihuanë.
“Në kuadër të operacionit janë kontrolluar dy shtëpi dhe objekte përcjellëse. Gjatë kontrollit, në njërën prej veturave (në bagazh) është gjetur dhe konfiskuar substancë,-dyshohet të jetë narkotike e llojit marihuanë, me vlerë në tregun vendor rreth 80,000 (tetëdhjetë mijë) euro.Në cilësinë e provave materiale janë gjetur dhe sekuestruar dëshmitë:53 kilogramë substancë, dyshohet të jetë narkotike e llojit marihuanë;2 telefona mobil dhe 2 automjete me targa vendore”, thuhet në komunikatë.
Të arrestuari si të dyshuar në këtë rast B.A., (viti i lindjes 1988, mashkull kosovar) dhe S.H., (viti i lindjes 1971, mashkull kosovar), pas intervistimit në prezencë të avokateve mbrojtës, me vendim të prokurorit të shtetit, ndalohen për 48 orë për procedura të mëtejshme ligjore.
Operacioni është mbështetur në terren nga dy ekipe të Njësisë së Reagimit të Shpejtë (NJRSH) – Gjilan, si dhe nga Njësia e Forenzikës Rajonale Gjilan, e cila ka bërë fotografimin, evidentimin dhe tërheqjen e dëshmive nga vendi i ngjarjes.
