Studentët e disa universiteteve dhe fakulteteve në Tiranë kanë bojkotuar mësimin këtë të mërkurë, në shenjë proteste pas përplasjeve të dhunshme të një dite më parë para Ministrisë së Arsimit.
Studentët e Universitetit të Mjekësisë dhe të Fakultetit të Shkencave të Natyrës janë nisur drejt ministrisë, ku pritet t’u bashkohen protestuesve të tjerë në tubimin e paralajmëruar rreth orës 14:00.
Bojkotit i janë bashkuar edhe nxënësit e gjimnazit “Partizani”, të cilët kanë ndërprerë mësimin dhe kanë bllokuar qarkullimin e automjeteve në rrugën “Tafaj”, në afërsi të shkollës së tyre, ka njoftuar media shqiptare A2CNN.
Ndërkohë, në bulevardin “Dëshmorët e Kombit”, para godinës së Kryeministrisë, është vendosur një autobot me ujë, ndërsa forca të Policisë po pozicionohen në zonën përreth, në kuadër të masave të sigurisë për protestën e paralajmëruar.
Protesta e së martës para Ministrisë së Arsimit nisi në mënyrë paqësore, por më pas u përshkallëzua në përplasje mes demonstruesve dhe policisë. Disa protestues shkulën pllaka trotuari dhe dëmtuan kangjellat e rrethimit të godinës, ndërsa hodhën gurë dhe vezë në drejtim të saj. Policia ndërhyri me ujë dhe gaz lotsjellës, ndërsa tensionet dhe episodet e dhunës vijuan deri në orët e mbrëmjes.
Për pasojë, disa persona mbetën të lënduar dhe morën trajtim mjekësor. Sipas njoftimit të Ministrisë së Shëndetësisë, tre kalimtarë vijojnë të qëndrojnë në spital, ku gjendja e tyre shëndetësore paraqitet e mirë. Njëri prej tyre po i nënshtrohet një ndërhyrjeje kirurgjikale.
Në spital ndodhen gjithashtu tre protestues, të cilët paraqiten në gjendje të mirë shëndetësore. Dy prej tyre do të vijojnë qëndrimin për trajtim, ndërsa për personin e tretë po kryhet vlerësimi mjekësor për të përcaktuar nëse nevojitet shtrimi.
Policia e Tiranës njoftoi arrestimin e 16 personave dhe procedimin penal të 49 të tjerëve.
