Zëvendëskryeministri i parë dhe ministri i Punëve të Jashtme dhe Diasporës, Glauk Konjufca, ka deklaruar se Kosova është dëshmi konkrete e suksesit të bashkëpunimit transatlantik.
Këtë deklaratë ai e ka bërë gjatë pjesëmarrjes në edicionin e 30-të të Forumit 2000 në Pragë, në panelin “Bridging the Divide – Crafting a Transatlantic Roadmap for Tech & Economic Security”, ku ka diskutuar për rëndësinë e bashkëpunimit transatlantik për paqen, sigurinë dhe stabilitetin në Ballkanin Perëndimor.
Konjufca ka theksuar se Kosova ka shënuar përparim të vazhdueshëm, duke kaluar nga një vend i shkatërruar nga lufta në një demokraci që gëzon paqe, falë qëndrueshmërisë së institucioneve dhe partneritetit me Shtetet e Bashkuara të Amerikës dhe Bashkimin Evropian.
Duke iu referuar sulmeve në Banjskë dhe në kanalin e Ibër-Lepencit, ai ka nënvizuar se institucionet e Kosovës kanë dëshmuar vendosmëri dhe kapacitet për t’u përballur me kërcënimet dhe përpjekjet për destabilizim, duke mbrojtur sigurinë e vendit me mbështetjen e vazhdueshme të partnerëve transatlantikë.
Në përfundim, Konjufca ka theksuar se përvoja e Kosovës dëshmon rezultatet konkrete të unitetit transatlantik dhe rëndësinë e ruajtjes së këtij partneriteti për sigurinë dhe të ardhmen e Ballkanit Perëndimor./teve1.info/
