Qeveria kroate i ka dorëzuar Parlamentit një propozim për ndryshimin e Ligjit për Tatimin mbi të Ardhurat, duke propozuar heqjen e plotë të taksës mbi pensionet.
Sipas propozimit, ulja aktuale e detyrimit tatimor mbi pensionet do të rritet nga 50 për qind në 100 për qind për pjesën e pensionit që i nënshtrohet normës më të ulët të tatimit mbi të ardhurat.
Në praktikë, kjo do të thotë se tatimi mbi të ardhurat për këto pensione do të jetë zero euro, raportojnë mediat kroate.
Qeveria përmendi shembullin e një pensionisti që merr një pension prej 800 eurosh. Me një zbritje personale prej 600 eurosh, baza e tatueshme është 200 euro. Nëse aplikohet një normë tatimore prej 20 për qind mbi këtë shumë, detyrimi tatimor është 40 euro. Megjithatë, sipas sistemit aktual, kjo shumë ulet me 50 për qind, që do të thotë se pensionisti paguan 20 euro tatim. Me propozimin e ri, ai tatim do të jetë zero euro.
Vlerësohet se heqja e taksës mbi pensionet do t’i ulë të ardhurat e njësive të vetëqeverisjes vendore me rreth 180 milionë euro. Ministri i Financave, Tomislav Çoriq, deklaroi më parë se ky ndryshim do të prekë rreth 541 mijë pensionistë. Qeveria planifikon që ndryshimet të hyjnë në fuqi në fillim të vitit 2027.
