Organizata e Veteranëve të Luftës së UÇK-së ka reaguar ndaj deklarimeve të partnerëve të Kosovës nga Bashkimi Evropian lidhur me amendamentet e miratuara për Dhomat e Specializuara.
Përmes një reagimi, OVL-UÇK ka kundërshtuar pretendimet se ndryshimet e miratuara nga Kuvendi i Kosovës cenojnë detyrimet ndërkombëtare të vendit, duke i cilësuar këto qëndrime si të papranueshme.
“Pretendimet e partnerëve tanë të BE-së se amendamentet për Dhomat e Specializuara shkelin vetvetiu detyrimet ndërkombëtare të Kosovës janë të paqëndrueshme dhe të papranueshme. Asnjë detyrim nuk mund të lërë asnjë institucion jashtë rendit kushtetues, mbikëqyrjes demokratike apo llogaridhënies”, thuhet në reagim.
Sipas OVL-UÇK-së, Dhomat e Specializuara janë krijuar për të trajtuar pretendime të caktuara të përfshira në raportin e Dick Martyt, ndërsa organizata pretendon se mandati dhe praktika e tyre kanë tejkaluar këtë qëllim.
“Dhomat u krijuan për të shqyrtuar pretendime të caktuara që burojnë nga raporti i Dick Martyt. Mandati dhe praktika e tyre kanë devijuar nga ai qëllim, duke e kthyer drejtësinë selektive në aktakuzë të zgjatur kundër luftës së drejtë çlirimtare të UÇK-së dhe luftëtarëve që luftuan në të”, thuhet më tej.
OVL-UÇK ka theksuar se institucionet e Kosovës kanë përgjegjësi për mbrojtjen e rendit kushtetues, sovranitetit dhe barazisë para ligjit.
“Institucionet e Kosovës e kanë për detyrë të mbrojnë sovranitetin shtetëror, barazinë para ligjit dhe dinjitetin e atyre që fituan lirinë tonë. Partnerët tanë duhet të përballen me këtë devijim dhe jo të pengojnë veprimin e ligjshëm parlamentar që e korrigjon atë”, përfundon reagimi i OVL-UÇK-së.
