Ushtruesja e detyrës së presidentes së Kosovës dhe kryetarja e Kuvendit, Albulena Haxhiu, ka kujtuar Adem Beqirin, Idriz Rrecajn dhe Salih Mëziun, të cilët u gjetën dhe u identifikuan pas 27 vitesh kërkimi.
Haxhiu ka marrë pjesë në ceremoninë përkujtimore të mbajtur në Qendrën e Kulturës “Rexhep Mitrovica” në Mitrovicë, ku janë nderuar tre anëtarët e “Grupit të Intelektualëve”.
Sipas Haxhiut, më 19 prill 1999, forcat serbe rrëmbyen 23 civilë shqiptarë nga Skenderaj dhe Mitrovica. Ata u ndaluan në Melajë, në Kalludër të Vogël, u keqtrajtuan dhe u vranë, ndërsa trupat e tyre u fshehën.
Gërmimet në Kalludër dhe Jabukë, si dhe analizat e ADN-së, konfirmuan identitetin e Adem Beqirit, Idriz Rrecajt dhe Salih Mëziut.
“U gjetën në varre pa emër, por tani do të prehen me emrat e tyre dhe familjet do të kenë një vend ku t’i kujtojnë e t’i nderojnë”, ka shkruar Haxhiu.
Ajo ka thënë se kërkimi duhet të vazhdojë për 20 anëtarët e tjerë të grupit dhe për të gjithë personat e zhdukur me dhunë.
“Familjet meritojnë të vërtetën, ndërsa për krimet e luftës duhet të ketë drejtësi”, ka deklaruar Haxhiu.
Në fund, Haxhiu u ka shprehur ngushëllime familjeve Beqiri, Rrecaj dhe Mëziu, duke përkujtuar tre të identifikuarit dhe të gjithë të rënët e të vrarët për lirinë e Kosovës./teve1.info/
