Denis Matoshi, i njohur edhe me pseudonimet “Dizdari”, “Alduth” dhe “Shqiptari i Gjatë”, është ekstraduar nga Emiratet e Bashkuara Arabe drejt Belgjikës dhe ndodhet tashmë në një burg belg.
Lajmi është konfirmuar nga ministrja belge e Drejtësisë, Annelies Verlinden, e cila tha se ekstradimi u realizua në bashkëpunim me autoritetet e Emirateve të Bashkuara Arabe.
Matoshi, 37 vjeç, është dënuar këtë vit nga drejtësia belge me 10 vite burg dhe 80 mijë euro gjobë, në kuadër të dosjes së trafikut të drogës “Yaramis”. Gjykata ka urdhëruar gjithashtu konfiskimin e rreth 7.5 milionë eurove, të konsideruara si të ardhura kriminale të lidhura me të, shkruan A2CNN.
Sipas autoriteteve belge, Matoshi është konsideruar një nga drejtuesit e organizatës kriminale shqiptare “Kompania Bello”. Ai jetonte prej vitesh në Dubai dhe ishte arrestuar atje rreth dy vite më parë, pas kërkesës së autoriteteve belge për ekstradimin e tij.
Prokuroria e Antwerp e ka lidhur atë me organizimin e tërheqjes së ngarkesave të kokainës nga porti i Antwerp-it. Hetimet bazohen, ndër të tjera, edhe në komunikime të zbërthyera nga rrjeti Sky ECC.
Sipas dosjes së prokurorisë, bashkëpunëtorë të tij dyshohet se kanë kryer edhe transferta parash për Matoshin gjatë viteve 2020 dhe 2021, me një vlerë totale prej rreth 1.75 milionë eurosh.
