Dragan Vladisavljeviq, ish-drejtor i Agjencisë së Inteligjencës Ushtarake të Serbisë (VOA), është emëruar ambasador i ri i Serbisë në Rusi.
Vladisavljeviqi u emërua në këtë post nga ish-presidenti serb, Aleksandar Vuçiq, më 25 shtator, vetëm dy ditë para se të largohej nga detyra, sipas një njoftimi të publikuar në Gazetën Zyrtare.
Ai ishte tërhequr më herët nga posti i ambasadorit të Serbisë në Azerbajxhan, detyrë të cilën e kishte marrë në maj të vitit 2021.
Në Moskë, Vladisavljeviqi do të zëvendësojë Momçilo Babiqin, i cili u tërhoq nga posti në fillim të këtij muaji.
Vladisavljeviqi ishte pjesë e Agjencisë së Inteligjencës Ushtarake që nga viti 2004, ndërsa nga viti 2015 deri më 2021 drejtoi Zyrën e Qeverisë së Serbisë për Negociatat me Prishtinën.
Emërimi i tij në Moskë vjen në një kohë kur Beogradi vazhdon të mbajë marrëdhënie të ngushta me Kremlinin, pavarësisht sanksioneve të Bashkimit Evropian, Shteteve të Bashkuara dhe vendeve të tjera perëndimore ndaj Rusisë për shkak të pushtimit të Ukrainës.
Serbia, ndonëse është kandidate për anëtarësim në Bashkimin Evropian, vazhdon të refuzojë t’u bashkohet sanksioneve perëndimore kundër Rusisë.
