Trajneri i Austrisë, Ralf Rangnick, ka folur për përballjen ndaj Kosovës, duke e cilësuar atë si një sfidë të vështirë për ekipin e tij.
Austria e nisi kampanjën në Grupin B3 të Ligës së Kombeve me fitore 3:1 ndaj Izraelit në Linz, ndërsa të dielën në stadiumin “Ernst Happel” në Vjenë do të përballet me Kosovën.
Rangnick pret një ndeshje edhe më të vështirë sesa ajo ndaj Izraelit.
“Pres që ndeshja të jetë edhe më e vështirë se ajo kundër Izraelit. Nuk mund të them ende se kush do të jetë kundërshtari më i vështirë në fund. Kosova e meritoi fitoren kundër Irlandës. Po përgatitemi për një kundërshtar që do të kërkojë shumë nga ne”, ka deklaruar Rangnick.
Trajneri austriak ka theksuar se skuadra e tij synon fitoren e dytë radhazi në shtëpi, përballë stadiumit të stërmbushur.
“Ne duam ta fitojmë edhe ndeshjen e dytë në shtëpi para një turme të mbushur plot. Nëse ia dalim ta bëjmë këtë, pozita fillestare për ndeshjet e mëtejshme sigurisht që do të jetë e mirë”, është shprehur ai.
Rangnick ka folur me respekt edhe për Kosovën, e cila në ndeshjen e parë të grupit e mposhti Irlandën me rezultat 1:0. Përballja në Vjenë do të jetë historike, pasi Austria dhe Kosova nuk janë përballur më parë në një ndeshje ndërkombëtare.
Në konferencën para ndeshjes, Rangnick ka dhënë edhe detaje rreth gjendjes së Michael Gregoritsch, i cili u largua nga fusha në ndeshjen ndaj Izraelit për shkak të një problemi në kyçin e këmbës.
“Duhet të presim dhe të shohim se si do të përparojë sot dhe nesër dhe si do të shkojnë trajtimet e tij. Është një problem dhimbjeje; nuk ka dëmtime strukturore. Do të marrim vendimin nëse ai mund të luajë në ditën e ndeshjes”, ka thënë trajneri i Austrisë.
Ndërkohë, Austria do të ketë ndryshim edhe në portë, por Rangnick nuk ka zbuluar se kush do ta zëvendësojë Alexander Schlager.
“Nuk do të fusim në fushë askënd që nuk është rikuperuar plotësisht”, ka theksuar ai.
Ndeshja Austri–Kosovë zhvillohet të dielën, nga ora 18:00, në stadiumin “Ernst Happel” në Vjenë. Të gjitha biletat për këtë përballje janë shitur.
